Plattdüüttsch in't Amt Breidenfeln

(Biller vom plattdüütschen Namiddag)

Bi den Plattdüütschen Harvst int Lauenborgische is denn ok ordentlich mitmakt worden.
Anfongen sind wi mit nen plattdüütschen Gottesdeinst. Nu is dat so, dat wie siet Februar een nieten Paster höbt, de kann över nich onnich platt schnaken. Dor köm em de Idee, dat dat ook anner Lüüt maken kunn. Hei övernähm de Leitung, de Patron Hubert Ihns de Predigt und een Gebet und Hella Köhn und Klaus Heitmann denn Rest.
Dat güng ook allens ganz gaut över de Bühn und de ca. söömzig Beseukers weun ook ganz taufreeden.

Bi de Gewerbeschau in September höbt wie denn Stammdisch ut den ollen Kraug von uns Anita einfach in dat Cafezelt stellt und hier würr denn de beiden Daag ok ordentlich platt snackt. De Disch wöör fast ümmer besett.

An drütten Oktober weer denn Ohrnbeer und hier hett de Theatergrupp denn dat erste mal na drei Johrn wedder richtig tauschlagen, so dat sick de ca. tweihundert Beseukers denn Buuk vör lachen fass holen müssen. De Theatergrupp hät dat so vääl Spass makt, dat se mit´n poor niete Mitspeelers denn nu ok wieder maken wölt.

In de Kinnergoorns und Speelkreise för de ganz Lütten versökt wi dat plattdüütsche ok wedder tau beleben. Deilwies klappt dat all ganz gaut. In denn Niendörper Kinnergorden höbt se dit Johr all een poor Wiehnachtsleeder inöft und in de Speelkreise in Breitenfeln, Old Mölln und Talkau höbt all de Kinner von den „Bürgerverein" een Billerbauk mit plattdüütsche Erklärungen kregen.
Vör de Kinner in de Kinnergoorns sööt ok noch week anschafft war`n, von dat Geld, dat de Theatergrupp biet Ohrnbeer sammel hett.

Een Höhepunkt bi denn plattdüütschen Harvst weer denn een musikalichen Namiddag in Siemers Gasthof. De Kreuger hett erst tau ein Tortenbüfett inlaad und de Lauenborger Gitarrnspeelers höpt denn plattdüütsche Leeders speelt. Wi höpt gornich wüsst wat de Breitenfeller singen könnt. De Deel in Kraug wör bet up den letzten Platz vull und all höbt se mitsungen. Een groot deil ut`n Kopp und den Rest ut de up`n Disch liegenden Leedertexte. Und twüschendörch hett de Theatergrupp denn wedder ordentlich de Lachmuskeln strapaziert mit söss Sketche. Een poor Biller höpt wie ok dor von makt, de könnt jü jüch hier ok ankieken.

As nächste Veranstaltung keum denn de Volkshochschaul mit een Vörleseabend. Vörleest höpt Hella Köhn, Gertrud Tupat, Hubert Ihns und dat erste Mal de Schölerin Rina Heins.
Rina hett in`t letzte Johr denn Vörlesewettbewerb in de Grundschaul in Breidenfeln gewunnen und anschließend denn Kreis.- und Bezirkswettbewerb. Bi denn Landeswettbewerb is see dann veerte worden. So harterfrischend wie disse Deern vörlest hett, mött wie eigentlich keen Angst hebben, dat dat Plattdüütsche utstarvt.
In de Paus geiv dat denn Schmoltbrot, Wiehnachtskekse und Punsch. Dat hett all`ns ganz bannig gaut schmeckt.

De Breidenfeller Landjugend hett up ehr Wiehnachtsfier an drütten Advent denn ok noch een plattdüütsch Theaterstück opführt.

Upschreben hett dit Klaus Heitmann.